Asociacioni i Komunave të Kosovës (AKK) ka reaguar kundër kërkesës së Komisionit Qendror të Zgjedhjeve (KQZ), bërë më 19 dhjetor 2025, që obligon komunat të mbulojnë shpenzimet për angazhimin e stafit teknik gjatë fundjavave për proceset zgjedhore.
AKK e ka cilësuar këtë kërkesë si të padrejtë dhe të paarsyeshme, duke theksuar se këto shpenzime burojnë nga proceset që menaxhohen nga vetë KQZ. Në reagimin e saj, AKK thekson se komunat tashmë përballen me kufizime buxhetore dhe procedura financiare të ndërlikuara, ndërsa shpenzimet për punë gjatë fundjavave konsiderohen të vështira dhe të pasigurta për t’u mbuluar.
Sipas Asociacionit, KQZ nuk ka kompetencën ligjore për t’i detyruar komunat të krijojnë shpenzime shtesë pa një bazë ligjore ose marrëveshje paraprake. AKK kërkon që KQZ të marrë përgjegjësinë e plotë për shpenzimet e proceseve zgjedhore, duke respektuar autonominë lokale dhe stabilitetin financiar të komunave, për të shmangur barrën e dyfishtë mbi administratat lokale.
Leave a Reply