Zëdhënësi i Qeverisë së Përkohshme të Kosovës, Përparim Kryeziu, deklaroi të martën për Radio Evropa e Lirë se autoritetet kanë filluar hetimet paraprake për të identifikuar autorët e mundshëm të incidenteve me të shtëna në kufirin me Malin e Zi, për të cilat autoritetet malazeze kanë dërguar një notë verbale Ambasadës së Kosovës në Podgoricë.
Mali i Zi deklaroi se të shtënat me armë zjarri dyshohet se kanë ardhur nga territori i Kosovës në zonën pranë qendrës së skijimit malazeze, Hajlla-Shtedim, afër kufirit midis të dy shteteve.
Incidenti i parë ndodhi në korrik të vitit të kaluar, kur u vunë re dëmtime në kabinën e qendrës së skijimit, ndërsa incidenti i dytë ndodhi më 24 gusht të këtij viti, kur u regjistruan të shtëna drejt një objekti të qendrës së skijimit. Autoritetet malazeze kanë hapur çështje dhe po kryejnë hetime për rastet.
Kryeziu tha se shteti i Kosovës është informuar përmes kanaleve diplomatike nga shteti malazez për incidentet dhe se Policia Kufitare e Kosovës ka filluar të patrullojë menjëherë në zonën e Shtedimit, por nuk janë gjetur prova materiale që konfirmojnë vendin apo rrethanat e incidentit.
“Megjithatë, me udhëzimin e Prokurorisë Themelore në Pejë, janë nisur hetimet paraprake për identifikimin e autorëve të mundshëm, duke u mbështetur edhe në informacione nga burime lokale,” deklaroi Kryeziu.
Ai tha se institucionet e sigurisë, konkretisht Policia e Kosovës, ka shprehur gatishmëri për të organizuar një takim me autoritetet kufitare malazeze për të intensifikuar bashkëpunimin, shkëmbimin e informacionit operativ dhe parandalimin e dukurive negative përgjatë vijës kufitare, dhe se vetëm këtë vit, dy vendet kanë kryer 30 patrullime të përbashkëta në zona kufitare.
Fadil Gashi nga Policia e Kosovës për rajonin e Pejës i tha ditë më parë Radios Evropa e Lirë se nuk ka asnjë informacion për incidente të sigurisë në kufirin me Malin e Zi, dhe se policia rajonale është më shumë e angazhuar “për ruajtjen e rendit dhe qetësisë publike”, dhe jo për incidente ndërkombëtare.
Mali i Zi dhe Kosova kanë nënshkruar Marrëveshjen për demarkacionin në vitin 2015. Mali i Zi e ratifikoi atë në të njëjtin vit, ndërsa Kuvendi i Kosovës tre vjet më vonë.
Leave a Reply