Presidentja e Kosovës, Vjosa Osmani, foli gjatë një interviste me Associated Press në kryeqytetin Prishtinë, të premten, më 29 shtator 2023. (AP Photo/Visar Kryeziu)
Gjykata Kushtetuese vendosi sot se seanca konstituive e Kuvendit ende nuk ka përfunduar dhe se nuk mund të konsiderohet e plotë pa zgjedhjen e një nënkryetari nga komuniteti serb.
Institucioni më i lartë gjyqësor në Kosovë ka urdhëruar që seanca konstituive të përfundojë brenda një afati prej 12 ditësh nga hyrja në fuqi e vendimit të sotëm.
Deputetëve u është kërkuar që të ushtrojnë detyrën e tyre në “interesin më të mirë të Republikës së Kosovës” dhe “në pajtim me Kushtetutën dhe Rregulloren e Kuvendit”, dhe të zgjedhin nënkryetarin serb.
Lëvizja Vetëvendosje kishte shpallur Kuvendin të konstituuar edhe pa zgjedhjen e një nënkryetari, duke përmbyllur seancën konstituive përmes kryetarit të Kuvendit, Dimal Basha.
Presidentja Vjosa Osmani kishte përdorur deklarata që kishin dalë nga një mbledhje e LVV-së në fillim të muajit, duke argumentuar në një konferencë për media pse Kuvendi, sipas saj, duhet të konsiderohet i konstituuar edhe pa zgjedhjen e një nënkryetari nga komuniteti serb.
Ajo foli për “bllokim të konstituimit të Kuvendit”, duke theksuar se nëse kjo ndodh për shkak të moszgjedhjes së një nënkryetari nga komuniteti serb “do të dëmtonte seriozisht, jo vetëm funksionalitetin institucional, por edhe themelet dhe vlerat mbi të cilat është ndërtuar Republika jonë”. Ajo përmendi “veton” që ka frikë se Kushtetuesja mund t’ia “japë” Listës Serbe në konstituimin e Kuvendit, në vendimin që pritet të shpallet në fund të muajit.
“Përderisa kemi kryetar, ka kuorum dhe kryesi, Kuvendi nuk duhet të bllokohet”, tha ajo.
Osmani zgjodhi të priste deri në publikimin e këtij vendimi nga Kushtetuesja, duke shpresuar se ajo do ta konsideronte Kuvendin të konstituuar. Më pas, siç deklaroi, do të thërriste partinë e parë dhe “menjëherë do të procedonte edhe me caktimin e mandatarit” për formimin e qeverisë së re.
Leave a Reply