Gjykata Kushtetuese e Kosovës ka vendosur që Seanca Konstituive e Kuvendit, e cila filloi më 15 prill 2025, nuk është përfunduar siç duhet për shkak të moszgjedhjes së nënkryetarit nga radhët e deputetëve të komunitetit serb.
Në vendimin e saj, Gjykata urdhëron që seanca të përfundojë brenda 12 ditëve dhe që deputetët të veprojnë në përputhje me Kushtetutën dhe interesin e përgjithshëm të Republikës së Kosovës, raporton Insajderi.
Drejtori Ekzekutiv i Rrjetit të OJQ-ve AVONET, Kenan Gashi, ka reaguar ndaj këtij vendimi duke theksuar se ai sjell një drejtim të ri për jetën parlamentare në vend dhe ndryshon dukshëm rolin e Listës Serbe në procesin e konstituimit të Kuvendit.
Sipas Gashit, Gjykata Kushtetuese ka pranuar njëzëri kërkesën e Listës Serbe dhe ka konstatuar se Kuvendi nuk është i konstituar në kontekstin e zgjedhjes së nënkryetarit të pestë. Ai gjithashtu thekson se Gjykata nuk e ka shpallur të pavlefshme apo kundërkushtetuese zgjedhjen e nënkryetarit të katërt nga komunitetet jo-serbe.
Ky vendim, sipas Kenan Gashit nga organizata AVONET, përfaqëson një kthesë të rëndësishme në jetën parlamentare të Kosovës, pasi roli i Listës Serbe në procesin e konstituimit të Kuvendit bëhet minimal.
“Ky vendim i jep një kahje të re jetës parlamentare në Republikën e Kosovës, sepse tashmë roli i Listës Serbe në konstituimin e Kuvendit është minimal. Gjykata, përmes këtij dispozitivi, nuk lëshohet fare në interpretimin e të drejtës së shumicës së deputetëve nga komuniteti serb për propozimin e nënkryetarit. Ajo vetëm përcakton që nënkryetari duhet të jetë nga radhët e komunitetit serb”, deklaroi Gashi.
Leave a Reply