Gjatë orëve të mbrëmjes, reshjet intensive kanë përkeqësuar ndjeshëm situatën e motit në qarkun e Gjirokastrës.
Reshjet e shumta kanë bërë që përroi i Ficos të dalë nga shtrati, duke përmbytur disa rrugë dhe duke shkaktuar ndërprerje të qarkullimit, veçanërisht në lagjen 18 Shtatori. Për shkak të kësaj situate, energjia elektrike është ndërprerë në disa zona.
Kryebashkiaku Flamur Golemi dhe Prefekti i rajonit u kanë bërë thirrje qytetarëve që të shmangin lëvizjet e panevojshme. Kryebashkiaku ka theksuar rëndësinë e kontaktimit të numrit 112 në rast nevoje për ndihmë, ndërsa ka siguruar se strukturat e emergjencave janë në terren për të menaxhuar situatën.
Ekipet e OSHEE-së janë aktualisht duke punuar për riparimin e defekteve për të rikthyer energjinë sa më shpejt. Autoritetet lokale vazhdojnë të monitorojnë situatën dhe këshillojnë qytetarët të tregojnë kujdes, pasi moti i paqëndrueshëm pritet të vazhdojë.
Leave a Reply