Pas reshjeve të dendura të shiut, Policia e Kosovës ka informuar për masat e marra në veri të vendit.
Në fshatin Beluçe të Leposaviqit, një urë është mbyllur përkohësisht për shkak të dëmtimeve që e bëjnë të rrezikshme për kalim. Kjo masë u mor pas një inspektimi nga zyrtarët komunalë dhe përfaqësuesit e Ministrisë së Infrastrukturës.
Ndërkohë, në Mitrovicë të Veriut janë evakuuar katër familje pasi shtëpitë e tyre u përmbytën. Situata e vërshimeve është evidentuar edhe në Zveçan.
Policia e Kosovës është duke monitoruar vazhdimisht situatën dhe ka bërë thirrje që qytetarët të kontaktojnë numrin 192 për çdo emergjencë. Ata shprehen të përkushtuar në mbrojtjen e jetës dhe pronës së qytetarëve, sidomos në kohë kur vendi përballet me sfida natyrore.
Gjendja aktuale vlerësohet si e menaxhueshme.
Leave a Reply