Ndodhje rrëshqitjeje dhe bllokim në autostradën “Ibrahim Rugova”

Pas reshjeve të dendura të shiut dhe borës, disa rrugë në Kosovë janë bërë të pakalueshme.

Ministri i Infrastrukturës në detyrë, Hysen Durmishi, njoftoi se ekipet janë duke punuar për të përmirësuar situatën në terren. Pjesa Prishtinë-Ferizaj është aktualisht e bllokuar për shkak të grumbullimit të ujit, dhe po punohet për hapjen e saj.

Në nënkalimin e Mazgitit, rruga drejt autostradës është gjithashtu problematike për shkak të bllokimit të kanalit atmosferik, por ndërhyrjet janë në vazhdim. Autostrada “Ibrahim Rugova” ka pësuar rrëshqitje dheu, por po merren masa për të rikthyer qarkullimin sa më shpejt.

Në Sllatinë, në rrugën Fushë Kosovë-Gjurgjicë, ka grumbullime të tjera uji, ndërsa ekipet po punojnë për sanimin e tyre. Rruga Zhur-Dragash ka pësuar lëvizje të trupit të rrugës, por është vendosur sinjalizimi përkatës për të siguruar qarkullimin në një shirit të vetëm.

Qytetarëve u kërkohet mirëkuptim dhe të shmangin lëvizjet e panevojshme në zonat e prekura.