Lidhja Demokratike e Kosovës (LDK) vazhdoi fushatën elektorale në Ferizaj, me kryetarin Lumir Abdixhiku që e përshkroi këtë qytet si një zonë me potencial të madh.
Abdixhiku theksoi se qyteti kërkon një qeverisje të drejtë dhe një vizion të qartë për të realizuar zhvillimin që meriton. Ai kritikoi gjendjen aktuale të Ferizajt, duke theksuar se, pavarësisht premtimeve të shumta, pak është bërë për qytetin që mund të jetë motor i zhvillimit për Kosovën.
Sipas Abdixhikut, vetëm LDK mund të ofrojë ndryshimin e nevojshëm. Visar Azemi, kandidati i LDK-së për kryetar të Ferizajt, prezantoi programin e tij për të transformuar qytetin në një vend më të jetueshëm.
Ai premtoi përkushtim ndaj qytetarëve dhe përkrahje për bizneset dhe të rinjtë. “Ferizaj duhet të kthehet nga një qytet i betonit në një qytet modern dhe të banueshëm,” tha Azemi, duke u angazhuar për një qeverisje të re që vendos qytetarët në plan të parë.
LDK gjithashtu prezantoi listën e kandidatëve për Kuvendin Komunal të Ferizajt, duke e cilësuar atë si një grup profesionistësh që synojnë të garantojnë përfaqësim të drejtë dhe transparencë.
Leave a Reply