Jehona Lushaku Sadriu nga Lidhja Demokratike e Kosovës ka kritikuar ashpër situatën aktuale me energjinë elektrike në vend, duke theksuar ndikimin e madh që kanë pasur reduktimet e rrymës në jetën e përditshme të qytetarëve dhe funksionimin e institucioneve.
Ajo ka vënë në dukje se ndërprerjet kanë prekur familjet, bizneset, sistemin arsimor, gjykatat dhe shërbimet shëndetësore, duke shkaktuar një kaos të përgjithshëm. Lushaku ka shprehur shqetësimin e saj për faktin se, ndërsa qytetarët po paguajnë çmime të larta për energjinë, po mbeten pa furnizim, dhe askush nuk po merr përgjegjësi për këtë situatë.
Ajo e ka cilësuar këtë si një dështim menaxhimi nga ana e Qeverisë. Duke kërkuar llogaridhënie nga ZRRE, Qeveria dhe institucionet përkatëse, Lushaku ka bërë thirrje për një plan emergjent dhe ndalimin e menjëhershëm të reduktimeve.
Ajo ka theksuar se qytetarët e Kosovës meritojnë energji të vazhdueshme dhe institucione të përgjegjshme.
Leave a Reply