Kryeprokurori i Prizrenit, Petrit Kryeziu, ka bërë të ditur se aksioni i sotëm i përbashkët me Policinë e Kosovës, i cili kishte në shënjestër manipulimet e mundshme të votave, është bazuar në informacione publike të verifikuara nga Komisioni Qendror i Zgjedhjeve.
Kryeziu theksoi se nisja e veprimeve erdhi si pasojë e indikacioneve të qarta për keqpërdorime në procesin zgjedhor. Ai shtoi se për shkak të këtyre dyshimeve, kanë vendosur të ndërmarrin masa me vetiniciativë.
Në lidhje me veprën penale të marrjes dhe dhënies së ryshfetit, Kryeziu zbuloi se një komisioner kishte filluar të bashkëpunonte me Prokurorinë. Gjatë ditës, është konfirmuar se ky komisioner ka ofruar dëshmi që ndihmojnë hetimet dhe se të dyshuarit mund të marrin rolin e dëshmitarëve bashkëpunëtorë.
Leave a Reply