Presidentja e Kosovës, Vjosa Osmani, ka shprehur vlerësimin e saj për avancimin e Aktit për Vlerësimin e Diskriminimit në Luginën e Preshevës në Komisionin për Punë të Jashtme të Dhomës së Përfaqësuesve të SHBA-së.
Ky zhvillim konsiderohet si një hap i rëndësishëm drejt trajtimit të diskriminimit të komunitetit shqiptar në Serbi. Osmani ka theksuar se ky akt ligjor dërgon një mesazh të qartë në arenën ndërkombëtare, duke treguar se shkeljet e të drejtave të njeriut ndaj shqiptarëve në Luginën e Preshevës nuk do të neglizhohen.
Ajo ka nënvizuar se autoritetet serbe kanë kryer vazhdimisht shkelje të të drejtave të pakicave, duke përfshirë kufizimin e përdorimit të gjuhës shqipe dhe margjinalizimin ekonomik. Presidentja e Kosovës ka falënderuar përfaqësuesit amerikanë që kanë mbështetur këtë nismë, si dhe organizatat e diasporës shqiptare që kanë sensibilizuar politikëbërësit amerikanë për situatën në Luginë.
Ajo ka vlerësuar mbështetjen dypartiake në Kongresin amerikan, e cila ka kontribuar në procedimin e aktit.
Leave a Reply