Kremlini përdor ‘Bordin e Paqes’ për të përhapur dezinformata

Iniciativa e presidentit Donald Trump për të përfshirë Kosovën në “Bordin e Paqes” ka ngjallur reagime të ndryshme në mediat ndërkombëtare.

Në Perëndim, kjo është parë si një hap për të rritur njohjen ndërkombëtare të Kosovës, ndërsa mediat ruse e kanë përdorur këtë për të promovuar narrativa kundër Kosovës. Artikuj në Pravda e përshkruajnë Kosovën si “republikë e vetëshpallur” dhe e portretizojnë atë si të varur nga SHBA.

Pjesëmarrja e Kosovës në këtë bord, që synon zgjidhjen e konflikteve globale përmes diplomacisë informale, është vlerësuar nga presidentja Vjosa Osmani si një mundësi historike për vendin. Ajo nënvizoi rëndësinë e kësaj ftese, duke e cilësuar si një arritje për njohjen ndërkombëtare të Kosovës.

Në të njëjtën kohë, mediat e kontrolluara nga Kremlini kanë pretenduar se Turqia mund të përdorë këtë platformë për të zgjeruar ndikimin në Ballkan. Këto pretendime janë pjesë e një fushate të vazhdueshme dezinformimi që synon të minojë stabilitetin rajonal dhe legjitimitetin e Kosovës në arenën ndërkombëtare.