Këshilltari kryesor i Presidentit francez Emmanuel Macron, Emmanuel Bonne, vizitoi Moskën të martën për të diskutuar me zyrtarë rusë, konfirmuan për Reuters burime të informuara.
Bonne, i cili ka qenë aktiv në dialogun Kosovë-Serbi dhe bashkautor i planit franko-gjerman, zhvilloi bisedime në Kremlin për çështje që lidhen me Ukrainën. Presidenca franceze nuk konfirmoi ose mohoi zyrtarisht bisedimet, por theksoi se diskutimet po zhvillohen me transparencë dhe në konsultim me Presidentin Zelenskiy dhe partnerët evropianë.
Burime diplomatike njoftuan se aleatët ishin informuar për iniciativën dhe Bonne pati takime me Yuri Ushakov, ndihmës të lartë të Presidentit rus Vladimir Putin. Në dhjetor, Macron shprehu nevojën për një riangazhim evropian në dialogun me Putinin, veçanërisht nëse përpjekjet e SHBA-ve për një marrëveshje paqeje në Ukrainë dështojnë.
Ai u tha gazetarëve se po bëhen përpjekje për rifillimin e dialogut me Rusinë, duke nënvizuar rëndësinë e rivendosjes së kanaleve të komunikimit për evropianët.
Leave a Reply