Gjykata e tenderëve ka vendosur që të përjashtojë nga aktivitetet e prokurimit publik për tre muaj kompaninë “Korabi” nga Drenasi, pas dyshimeve për mashtrim.
Vendimi, i marrë më 19 janar 2026, ndaloi pjesëmarrjen e kompanisë në aktivitete të tilla deri më 14 prill 2026. Organi Shqyrtues i Prokurimit (OSHP) mori këtë masë pas kërkesës së Komunës së Drenasit, e cila kishte pretenduar se “Korabi” kishte dorëzuar dokumente të falsifikuara, veçanërisht në lidhje me përfshirjen e inxhinierit Vehbi Goxhuli në një projekt për rehabilitimin e rrugëve.
Gjatë shqyrtimit, OSHP konstatoi mospërputhje serioze midis dokumenteve të paraqitura dhe deklaratave të inxhinierit, i cili mohoi autorizimin për përdorimin e dokumenteve të tij. Megjithatë, fakti që komunikimi dhe pagesat ndërmjet palëve vazhduan gjatë vitit 2025 ndikoi në kufizimin e periudhës së përjashtimit.
Ndaj këtij vendimi nuk lejohet apelim administrativ, por pala e pakënaqur mund të ngrejë padi në gjykatën kompetente brenda 30 ditëve.
Leave a Reply