Ministri i Mbrojtjes në detyrë, Ejup Maqedonci, ka shprehur ngushëllimet e tij për familjen e Jurgen Karajt, i cili u gjet i pajetë në lumin Mat në Shqipëri nga ekipet e specializuara të kërkim-shpëtimit të Forcës së Sigurisë së Kosovës.
Trupi i 30-vjeçarit, i cili ra në lumë më 10 janar së bashku me një mik të tij, u lokalizua afër fshatit Urakë pas disa ditësh kërkimesh intensive në terren të vështirë. Kërkimi u realizua në bashkëpunim me Forcat e Armatosura të Shqipërisë.
Pas zbulimit, trupi i të ndjerit iu dorëzua Policisë së Shqipërisë dhe ekipit të forenzikës për procedurat e mëtejme. Maqedonci, përmes një deklarate, ka shprehur ngushëllimet e tij familjes dhe të afërmve të viktimës, duke theksuar rëndësinë e bashkëpunimit ndërmjet dy vendeve në situata të tilla tragjike.
Leave a Reply