Në emisionin e sontëm në ATV, kandidatët për kryetar të Komunës së Vushtrrisë u përfshinë në një debat të ashpër, i cili u karakterizua kryesisht nga akuza dhe kundërakuza.
Gjatë këtij diskutimi, mungoi prezantimi i qartë i planeve konkrete për zhvillimin e Vushtrrisë gjatë katër viteve të ardhshme. Pas përfundimit të debatit, gazetari i Veriu.info, Gazmend Morina, shprehu zhgënjimin e tij përmes një postimi publik.
Ai kritikoi kandidatët për mungesën e guximit për të trajtuar çështjen e fajdexhinjve, të cilët, sipas tij, po ndikojnë negativisht në qytetin. Morina theksoi se debati u fokusua në çështje të parëndësishme dhe se kandidatët u shmangën nga përballja me problemet reale të qytetit.
Ai i cilësoi diskutimet si pa thelb dhe shprehu zhgënjim për nivelin e ulët të debatit, duke i bërë thirrje kandidatëve të reflektojnë mbi çështjet që prekin vërtet komunitetin.
Leave a Reply