Presidentja Osmani vlerëson lidhjet me Dukën e Madh të Luksemburgut

Presidentja e Kosovës, Vjosa Osmani, ka dërguar urimet e saj të ngrohta për Dukën e Madh Guillaume, i cili ka marrë fronin e Luksemburgut.

Në një postim në platformën X, Osmani theksoi dëshirën për të thelluar bashkëpunimin mes dy vendeve. Duke e uruar Dukën e Madh për ngjitjen në fron, Presidentja shprehu shpresën që mbretërimi i tij të jetë i mbushur me mençuri dhe prosperitet për popullin e Luksemburgut.

Ajo vlerësoi marrëdhëniet e ngushta që Kosova ka ndërtuar ndër vite me familjen mbretërore luksemburgase, duke përmendur rolin e Dukës së Madh Henri dhe Dukeshës së Madhe Maria Teresa. Osmani gjithashtu theksoi rëndësinë e miqësisë dhe mbështetjes që këto personalitete kanë treguar ndaj Kosovës.

Ajo rikonfirmoi angazhimin për të forcuar lidhjet me Luksemburgun, duke e cilësuar këtë vend si një aleat të rëndësishëm për Kosovën. “Presim me padurim të avancojmë partneritetin tonë,” përfundoi Presidentja.