Njëzetenjë pozita të reja për prokurorë në Prokuroritë Themelore të Kosovës pritet të plotësohen, pasi 153 kandidatë janë duke iu nënshtruar testimit me shkrim në Akademinë e Kosovës për Siguri Publike në Vushtrri.
Procesi i testimit, i organizuar nga Këshilli Prokurorial i Kosovës, po zhvillohet me qëllim të rekrutimit dhe emërimit të prokurorëve të rinj. Kandidaturat përfshijnë 71 gra dhe 82 burra, të cilët po konkurrojnë për këto pozita të rëndësishme.
Testimi po mbahet në prani të vëzhguesve vendorë dhe ndërkombëtarë, për të siguruar transparencë dhe integritet në proces. Ardian Hajdaraj, kryetar i Komisionit për Rekrutimin e Prokurorëve, po mbikëqyr administrimin e testimit së bashku me anëtarët e tjerë të komisionit.
KPK ka njoftuar se do të informojë publikun për fazat e ardhshme të rekrutimit, duke përfshirë intervistat me gojë, deri në përfundimin e procesit me emërimin e kandidatëve të suksesshëm.
Leave a Reply