Limaj: Asnjëherë s’kemi dhënë mbështetje për Kurtin

Fatmir Limaj, udhëheqësi i Nismës Socialdemokrate, ka pohuar se partia e tij nuk ka ofruar kurrë mbështetje për kryeministrin aktual, Albin Kurti.

Në një intervistë në emisionin “Rubikon” të Klan Kosovës, Limaj theksoi se gjatë gjithë karrierës së tij politike ka vepruar bazuar në bindjet e tij personale. Ai sqaroi se gjithmonë ka mbajtur qëndrime të forta për disa çështje, ndërsa për të tjera ka shprehur dyshime.

Limaj përmendi rastin e demarkacionit, ku si deputet i Kosovës ndjeu krenari për pjesëmarrjen e tij në votim, pavarësisht dilemat që kishte për shkak të mungesës së ekspertizës. Ai theksoi se nuk do të votonte kundër interesave të vendit kur kishte dyshime.

Limaj gjithashtu deklaroi se në raste kur kishte paqartësi, si për Gjykatën Speciale dhe marrëveshjen e vitit 2013, ka zgjedhur të mos marrë pjesë në votim, duke kërkuar më shumë sqarime përpara se të vendoste.