Balotelli kritikon ekipin italian për mungesë pasioni në lojë

Mario Balotelli ka kritikuar hapur kombëtaren italiane, duke vënë në pikëpyetje pasionin dhe përkushtimin e lojtarëve aktualë.

Ish-sulmuesi i Genoas ndau mendimet e tij gjatë një eventi, duke theksuar se ekipi i Gennaro Gattusos po përballet me mungesë të thellë motivimi. “Kur unë përfaqësoja Italinë, ndjeja krenari të madhe.

Kjo është ajo që mungon sot,” tha Balotelli, duke shtuar se shpesh vëren lojtarë që nuk kanë dëshirën e duhur për të mbrojtur fanellën “azzurre”. Gjatë diskutimit, ai u pyet nëse ai ishte “sulmuesi i fundit i vërtetë” i kombëtares italiane, dhe me humor pranoi: “Kështu më thonë të gjithë”.

Megjithatë, Balotelli shfaq optimizëm për të ardhmen, duke përmendur talente si Francesco Pio Esposito dhe Francesco Camarda, të cilët, sipas tij, kanë shumë cilësi. Në përfundim, Balotelli shprehu besimin se Italia do të kualifikohet për Kupën e Botës 2026, duke theksuar sigurinë e tij për këtë arritje.