Andin Hoti, kryesues i Komisionit Qeveritar për Personat e Zhdukur dhe i propozuar nga Albin Kurti për postin e Ministrit të Familjes dhe Mirëqenies Sociale, ka shprehur qëndrimin e tij pas dështimit për të formuar Qeverinë “Kurti 3”.
Në një postim në Facebook, Hoti theksoi se vendimi për të pranuar propozimin ishte i mirëpeshuar, duke marrë parasysh situatën politike aktuale. Ai nënvizoi se përgjegjësia e tij ndaj qytetarëve mbetet e njëjtë, pavarësisht zhvillimeve.
Hoti vlerësoi se shërbimi në institucione është detyrim ndaj qytetarëve dhe jo privilegj. Ai shprehu keqardhje për mungesën e bashkëpunimit të klasës politike për të vepruar në interes të shtetit.
Me mirënjohje për besimin e dhënë, ai vlerësoi rëndësinë e udhëheqjes së Ministrisë për Familjen dhe Mirëqenien Sociale, e cila kujdeset për kategoritë më të ndjeshme në Kosovë. Në përfundim, Hoti deklaroi se do të vazhdojë të kontribuojë në shërbim të qytetarëve, duke e parë politikën si një mjet shërbimi.
Leave a Reply