Kurti në Paris: Integrimi i Ballkanit në BE dhe NATO është jetik për Evropën

Kryeministri në detyrë i Kosovës, Albin Kurti, mori pjesë në një darkë të organizuar nga Qarku Diplomatik i Parisit të martën mbrëma, ku ishin të pranishëm figura të larta të Francës nga fushat diplomatike, politike dhe ekonomike.

Sipas një njoftimi nga Zyra e Kryeministrit, Kurti shprehu mirënjohjen për ftesën, një ditë para fillimit të Forumit të Paqes në Paris, ku mblidhen liderë nga mbarë bota. Gjatë darkës, Kurti theksoi rëndësinë e integrimit të Kosovës dhe Ballkanit Perëndimor në Bashkimin Evropian dhe NATO.

Ai vuri në dukje se kjo është në interesin ekonomik dhe të sigurisë së BE-së dhe vendeve të saj anëtare. Sipas tij, zgjerimi i BE-së dhe reformat e brendshme janë procese që duhet të ecin krah për krah.

Kryeministri Kurti do të marrë pjesë të mërkurën në edicionin e tetë të Forumit të Paqes në Paris, me ftesë të Presidentit Emmanuel Macron.