Ministrja në detyrë e Punëve të Jashtme dhe Diasporës, Donika Gërvalla, ka kritikuar ish-zyrtarët e Bashkimit Evropian, Josep Borrell dhe Miroslav Lajçak, për vendosjen e sanksioneve ndaj Kosovës.
Në një intervistë për “DPT te Fidani” në Klan Kosova, Gërvalla deklaroi se masat u ndërmorën pas ngjarjeve në veri të Kosovës, ku forcat e KFOR-it u sulmuan nga grupe të udhëhequra nga Serbia, duke shkaktuar plagosje të ushtarëve hungarezë dhe italianë. Ajo theksoi se Bashkimi Evropian, në vend që të kërkonte përgjegjësi nga autorët e dhunës, zgjodhi të sanksiononte Kosovën.
Duke folur për situatën, Gërvalla e përshkroi atë si të pashpjegueshme, ndërsa kritikoi Borrell dhe Lajçak për qasjen e tyre ndaj dialogut me Kosovën, të cilën e konsideroi si presion të pajustifikueshëm. Gërvalla gjithashtu vuri në dukje se Kaja Kallas, shefja e re e Politikës së Jashtme të BE-së, po punon për heqjen e këtyre masave.
Në një pyetje lidhur me rolin e Lajçak dhe Borrell në vendosjen e sanksioneve, ajo u përgjigj se ato ishin miratuar pa kundërshtime.
Leave a Reply