Shaqiri dhe Kamberi në debat gjatë fitores së Baselit ndaj Zurichut

Gjatë ndeshjes mes Baselit dhe Zurichut, një situatë interesante u zhvillua mes dy futbollistëve shqiptarë, Xherdan Shaqiri dhe Lindrit Kamberi.

Detyra e Kamberit ishte të ruante Shaqirin, i cili arriti të kontribuonte me dy asistime në fitoren 2-0 të Baselit. Gjatë lojës, një moment tensioni u shfaq kur Kamberi shtyu Shaqirin dhe të dy u përfshinë në një shkëmbim verbal, por situata u zgjidh shpejt.

Shaqiri shpjegoi se Kamberi përdorte ndërhyrje të ashpra për ta penguar atë, por ai arriti të ndikonte në lojë. “Kisha një përballje të drejtpërdrejtë me Kamberin.

Nuk ishte e lehtë, ndjeja agresionin, por arrita të bëja diferencën,” tha Shaqiri. Nga ana tjetër, Kamberi theksoi se e shijoi duelin dhe se gjithçka mbeti në fushë.

Ai u vlerësua për paraqitjen e tij, pavarësisht humbjes së Zurichut. Kamberi shprehu interes për të përfaqësuar Kosovën, por ende nuk është kontaktuar nga trajneri Franco Foda.