Në Pallatin e Kongreseve në Tiranë, homazhet për ish-kryeministrin Fatos Nano filluan sot në orën 08:30.
Nano, i cili ndërroi jetë më 31 tetor në moshën 73-vjeçare, po nderohet me arkëmortin e mbështjellë me flamurin kombëtar në hollin kryesor, ku qindra qytetarë kanë ardhur për t’i dhënë lamtumirën e fundit. Në mesin e personaliteteve që kanë bërë homazhe ishin deputeti socialist Taulant Balla, ish-deputeti Gramoz Ruçi dhe figura të tjera të Partisë Socialiste.
Ruçi e vlerësoi Nanon si një lider që sakrifikoi pushtetin për shtetin. Deputeti Erion Braçe gjithashtu u pa i emocionuar para arkëmortit.
Ceremonia ka tërhequr dhe përfaqësues nga opozita, përfshirë Lulzim Bashën, Fatmir Mediun, Agron Dukën dhe Arjan Ndojën, si dhe qytetarë nga e gjithë Shqipëria. Homazhet publike do të vazhdojnë deri në orën 11:00, pasuar nga nderimet shtetërore dhe ceremonia funebre në 12:05.
Kryeministri Edi Rama dhe bashkëshortja e Nanos, Xhoana Nano, pritet të mbajnë fjalë në ceremoni. Në nderim të tij, e diela është shpallur ditë zie kombëtare dhe do të mbahet një minutë heshtje në orën 12:00.
Nga Kosova pritet ardhja e kryeministrit Albin Kurti dhe disa anëtarëve të qeverisë, ndërsa nga Maqedonia e Veriut do të marrë pjesë Ali Ahmeti, dhe nga Mali i Zi, zëvendëskryeministri. Nano do të prehet në varrezat e Sharrës, me kërkesën e familjes për privatësi gjatë varrimit.
Leave a Reply