Presidenti i Finlandës, Alexander Stubb, ka deklaruar se bota po përballet me një “epokë të re të armëve bërthamore”.
Këto komente vijnë pas njoftimit të Shteteve të Bashkuara për rifillimin e testimeve bërthamore, një zhvillim që ngre shqetësime për ndryshime të mundshme në ekuilibrin strategjik global. Në një fjalim të mbajtur në Helsinki më 3 nëntor, Stubb u shpreh se rëndësia e armëve bërthamore po shtohet, ndërsa “logjika e frenimit” dhe “stabiliteti strategjik” po përballen me sfida të reja.
Javën e kaluar, presidenti amerikan Donald Trump njoftoi se SHBA-ja do të rinisë testimet e armëve bërthamore, duke sjellë spekulime për një shpërthim të mundshëm bërthamor, të parin që nga viti 1992. Ky zhvillim vjen në sfondin e testimeve të reja bërthamore të Rusisë, e cila ka provuar raketën lundruese Burevestnik dhe një dron nënujor me kapacitet bërthamor.
Ndërkohë, që nga vitet 1990, as Rusia dhe as Kina nuk kanë kryer testime të plota, ndërsa Koreja e Veriut mbetet e vetmja që ka kryer shpërthime bërthamore në dekadat e fundit.
Leave a Reply