Punonjësit e Radio Televizionit të Kosovës (RTK) kanë protestuar duke kërkuar pagat që nuk i kanë marrë prej gjashtë ditësh.
Ata mbanin në duar pankarta me mesazhe si “Kërkojmë dinjitet, jo mëshirë” dhe “RTK-ja nuk hesht edhe në errësirë”. Përfaqësuesi i sindikatës, Gëzim Bimbashi, i kërkoi Kuvendit, qeverisë dhe menaxhmentit të RTK-së të zgjidhin situatën, përndryshe paralajmëroi grevë të përgjithshme.
Bimbashi theksoi se punonjësit po kërkojnë të drejtën e tyre ligjore për pagat, jo për luks, por për atë që u takon. Ai kritikoi se ndërsa pagat në shtet janë rritur, punonjësit e RTK-së nuk marrin as atë që meritojnë për punën e tyre të përditshme.
Ndërkohë, Naile Dema-Selmani, nënkryetarja e Asociacionit të Gazetarëve të Kosovës, i bëri thirrje kryeministrit në detyrë, Albin Kurti, që të alokojë urgjentisht pagat për të ndalur presionin financiar mbi punonjësit e RTK-së. Ajo kërkoi që kjo të bëhet menjëherë, duke theksuar rëndësinë e mbështetjes për transmetuesin publik.
Leave a Reply