Drejtuesit e Administratës Tatimore të Kosovës, Mentor Hyseni dhe Isen Lipovica, morën pjesë në Samitin e Administratave Tatimore të Bashkimit Evropian (TADEUS) në Kopenhagë, Danimarkë.
Ky samit, i organizuar nga Komisioni Evropian dhe Agjencia Daneze e Tatimeve, mblodhi përfaqësues nga administratat tatimore të vendeve të BE-së, si dhe nga shtetet kandidate dhe ato potencialisht kandidate për anëtarësim. Në këtë ngjarje, fokus kryesor ishte thellimi i bashkëpunimit dhe shkëmbimi i përvojave ndërmjet administratave tatimore në Evropë.
Temat kryesore përfshinin modernizimin e sistemeve tatimore, digjitalizimin e proceseve dhe përmirësimin e transparencës fiskale. Gjatë diskutimeve, Hyseni nënvizoi rëndësinë e bashkëpunimit ndërmjet shteteve dhe digjitalizimin si elemente kyçe për forcimin e administratës tatimore të Kosovës.
Ai theksoi integrimin e praktikave evropiane dhe përmirësimin e shërbimeve për tatimpaguesit. Administrata Tatimore e Kosovës theksoi se pjesëmarrja në këtë samit shpreh angazhimin e institucioneve të vendit për të qenë pjesë aktive e zhvillimeve evropiane në fushën tatimore dhe për avancimin e standardeve të transparencës dhe efikasitetit profesional.
Leave a Reply