Në Gjykatën Themelore të Prishtinës u zhvillua një seancë dëgjimore lidhur me kërkesën e organizatës Avonet për pezullimin e projektbuxhetit të vitit 2026, duke pretenduar se ky projekt shkel Ligjin për Qeverinë dhe Kushtetutën e Kosovës.
Përfaqësuesi i Avonet, Shefki Berisha, argumentoi se ky veprim do të shmangte një dëm të pariparueshëm financiar për shtetin, pasi pagesat ndaj operatorëve ekonomikë mund të shkaktonin pasoja të dëmshme në të ardhmen. Nga ana tjetër, përfaqësuesi i Ministrisë së Financave, Art Jashari, kundërshtoi kërkesën, duke theksuar se miratimi i saj do të ndërhynte në kompetencat e pushtetit ekzekutiv dhe legjislativ, duke cenuar interesin publik.
Ai argumentoi se projektbuxheti nuk është një akt përfundimtar dhe se paditësi nuk ka treguar dëme të qarta për interesat e tij. Gjykatësi Kreshnik Kaqiu e përmbylli seancën dhe sqaroi se vendimi do t’u komunikohet palëve me shkrim.
Padia e Avonet, dorëzuar më 3 nëntor 2025, kërkon anulimin e vendimit të qeverisë për ndarjet buxhetore, duke pretenduar shkelje të Kushtetutës dhe Ligjit për Qeverinë.
Leave a Reply