Deda: Qeveria ushtron presion të madh në Mitrovicë

Të dielën, në 18 komuna të Kosovës do të zhvillohet raundi i dytë i zgjedhjeve lokale, pas dështimit për të zgjedhur kryetar më 12 tetor.

Sipas analistëve, gara më e theksuar pritet të jetë në Prishtinë dhe Mitrovicë. Ilir Deda, duke folur në emisionin Rubikon të Klan Kosovës, theksoi se Mitrovica përbën një provë për dinjitetin e qytetarëve.

Ai vuri në dukje se qeveria aktuale ushtron presion mbi banorët e Mitrovicës, duke i kërcënuar në mënyrë të tërthortë me mos dhënie fondesh nëse nuk fitohet kandidati i saj. Në Prishtinë, sipas Dedës, kryeministri në detyrë, Albin Kurti, premtoi investime prej 1.5 miliard eurosh nëse zgjidhet një qeveri e përgjegjshme.

Kjo, sipas tij, ka implikime edhe për komunat e tjera. Deda u shpreh se banorët e Mitrovicës duhet të votojnë sipas dëshirës së tyre, pavarësisht presioneve.

Ai nënvizoi rëndësinë e ruajtjes së dinjitetit kundër presioneve të qeverisë.