Komisioni Qendror i Zgjedhjeve (KQZ) është në procesin e certifikimit të rezultateve për kuvendet komunale, duke pritur përfundimin e ankesave në PZAP.
Ndërkohë, është bërë e ditur se shpallja e rezultateve përfundimtare për kryetarët e 18 komunave do të ndodhë brenda dhjetë ditëve. Raundi i dytë i zgjedhjeve për këto komuna, ku nuk pati fitues në raundin e parë, u mbajt më 9 nëntor.
Zëdhënësi i KQZ-së, Valmir Elezi, informoi se materialet zgjedhore janë transferuar në qendrat komunale të numërimit pas përfundimit të procesit të votimit dhe numërimit. Numërimi i votave për kryetarë bëhet në vendvotime dhe rezultatet publikohen nga KQZ-ja.
Verifikimi i rezultateve është duke u zhvilluar në qendrat komunale në prani të vëzhguesve. Ndërkohë, është lejuar votimi me kusht dhe me ekipe mobile për votuesit me nevoja të veçanta, si dhe votimi përmes postës jashtë Kosovës.
Elezi njoftoi se numërimi i votave të veçanta dhe ato jashtë vendit do të bëhet së shpejti në Qendrën e Numërimit dhe Rezultateve. Ai theksoi se deri më tani nuk janë raportuar parregullsi apo probleme gjatë procesit të verifikimit të rezultateve.
Leave a Reply