Basha ka bërë të ditur se ka zhvilluar një takim me protestuesit e Sindikatës së Pavarur të RTK-së dhe Shoqatës Sindikale të Radios së Kosovës.
Fillimisht, ai është takuar me protestuesit dhe më pas ka pritur përfaqësuesit e tyre në Kuvend për të diskutuar çështjet lidhur me pagat e punëtorëve dhe stabilitetin financiar të RTK-së. Gjatë bisedës, Basha ka shprehur mbështetjen e tij të plotë për zgjidhjen e situatës dhe ka theksuar se ekzistojnë mundësi ligjore për të vepruar.
Ai ka kërkuar formimin e komisioneve parlamentare në mbledhjen e parë të Kryesisë së Kuvendit, për të lehtësuar miratimin e raportit financiar të RTK-së dhe procedimin e fondeve përmes Thesarit të Republikës së Kosovës. Mbështetje për procesin kanë treguar përfaqësuesit e komuniteteve joshumicë joserbe dhe nënkryetari i Kuvendit, Nenad Rashiq.
Megjithatë, Basha ka theksuar se mbështetja aktuale nuk është e mjaftueshme për themelimin e komisioneve, pasi kërkohet pjesëmarrja e më shumë se gjysmës së deputetëve dhe miratimi me shumicë të thjeshtë. Ai ka bërë thirrje për bashkëpunim nga të gjithë deputetët për të mbështetur këtë iniciativë.
Leave a Reply