Banka Qendrore Evropiane (BQE) ka rekomanduar që qytetarët e Evropës të mbajnë midis 70 dhe 100 euro para të gatshme në shtëpi, sipas një studimi të fundit. Ky sugjerim vjen si rezultat i rritjes së kërkesës për para të gatshme gjatë krizave, si ato financiare, ushtarake dhe shëndetësore, siç është pandemia e COVID-19 dhe pushtimi i Ukrainës nga Rusia. Studimi i BQE-së thekson se “shfaqja e krizave të papritura” ka çuar në një rritje të menjëhershme të përdorimit të parave të gatshme.
BQE-ja këshillon mbajtjen e kartëmonedhave shtesë për të përballuar situata kur sistemet elektronike të pagesave mund të dështojnë, duke përmendur raste si ndërprerjet e mëdha të energjisë elektrike apo sulmet kibernetike. Autoritetet e disa vendeve, përfshirë Holandën dhe Austrinë, inkurajojnë këtë praktikë si një masë për të mbuluar nevojat për 72 orë në raste emergjente.
Në përpjekjet për të përgatitur qytetarët për kriza të mundshme, Komisioni Evropian ka këshilluar grumbullimin e ushqimit, ujit dhe ilaçeve për 72 orë. Kjo strategji e gatishmërisë mbështetet nga rekomandimet e një raporti të paraqitur nga ish-presidenti i Finlandës, Sauli Niinisto, dhe është frymëzuar nga praktikat në vendet skandinave.
Leave a Reply