Memli Krasniqi, i cili dha dorëheqjen nga posti i kryetarit të PDK-së, ka ngritur akuza të rënda ndaj kryeministrit në detyrë, Albin Kurti, për manipulime të pretenduara në zgjedhjet e 9 shkurtit në Mitrovicë.
Gjatë një interviste në emisionin “Rubikon” në Klan Kosova, Krasniqi theksoi se autoriteti shtetëror është keqpërdorur në favor të një partie dhe kundër kandidatit Arian Tahiri. Krasniqi deklaroi se në Mitrovicë është përdorur pushteti shtetëror në një mënyrë të paprecedentë për të dëmtuar një kandidat të ri, ndërsa të gjithë mekanizmat shtetërorë janë aktivizuar kundër tij.
Ai pretendon se ky është një rast i paparë në një demokraci normale, ku kryeministri, ministrat dhe deputetët kanë ndërhyrë për të ndikuar procesin. Sipas Krasniqit, Kurti ka ndërhyrë përmes vendimeve financiare abuzive që përfshijnë qindra miliona euro, me qëllim manipulimin e votuesve.
Vendimet, të cilat përfshijnë ndihma për studentët dhe pensionistët, janë parë si përpjekje për të fituar në komunën e Mitrovicës. Ai përfundoi duke akuzuar Kurtin për humbje të racionalitetit politik në këtë përballje.
Leave a Reply