Pas ngritjes së aktakuzës nga Prokuroria Speciale për skandalin me rezervat shtetërore, ministrja në detyrë e Industrisë, Ndërmarrësisë dhe Tregtisë, Rozeta Hajdari, ka sqaruar situatën duke theksuar se kjo ndodhi gjatë luftës në Ukrainë.
Ajo deklaroi se Prokuroria pretendon se ka përfituar persona të tjerë me dëmtim të buxhetit të shtetit gjatë procedurave të sigurimit të rezervave në shkurt dhe mars të vitit 2022. Sipas saj, rezervat shtetërore krijohen për të mbrojtur popullsinë dhe ekonominë në raste krizash.
Hajdari përmendi se në vitin 2021, ministria shpalli tri procedura prokurimi për rezervat, por vetëm një përfundoi me sukses. Dy të tjera dështuan për shkak të mungesës së ofertave.
Ajo shpjegoi se lufta në Ukrainë shkaktoi ndërprerje në eksportet globale, duke vështirësuar sigurimin e mallrave. Ministrja kritikoi mënyrën e mbledhjes së provave nga hetuesit, duke pretenduar se ky veprim ishte kryer pa leje të sigurisë dhe jashtëligjshëm.
Hajdari theksoi se MINT ka denoncuar hetuesit dhe se Inspektorati Policor ka konfirmuar shkeljen ligjore. Ajo përfundoi duke thënë se siguria kombëtare ishte në rrezik dhe kërkonte veprim të menjëhershëm.
Leave a Reply