Instituti Hidrometeorologjik i Kosovës ka paralajmëruar reshje të dendura, të cilat mund të shkaktojnë vërshime në disa zona të vendit, duke lëshuar një alarm të nivelit të verdhë.
Reshjet e parashikuara pritet të përkeqësojnë situatën që nga mbrëmja e së shtunës. Në njoftimin e institutit thuhet se, ndërsa lumenjtë aktualisht kanë pësuar rënie, prurjet e ujit pritet të rriten për shkak të reshjeve, sidomos në rajonin lindor të vendit, në Pellgun e Moravës së Binçës.
Rritja e ujërave nga zonat malore mund të ndikojë në përmbytje të mundshme të lumit Morava e Binçës dhe degës së tij, Kriva Reka. Gjithashtu, situata kritike pritet të shfaqet edhe në pjesën veri-lindore, qendrore dhe jugore të vendit, përkatësisht në pellgjet e Llapit, Sitnicës dhe Lepencit.
Instituti këshillon qytetarët të jenë të kujdesshëm dhe të informohen mbi kushtet meteorologjike, duke shmangur aktivitetet që mund të jenë të rrezikshme.
Leave a Reply