Dega e Lëvizjes Vetëvendosje në Prishtinë ka akuzuar kryetarin e Komunës, Përparim Rama, dhe Lidhjen Demokratike të Kosovës, për ndërprerjen e shërbimeve të transportit publik në Prishtinë.
Sipas tyre, kjo situatë është rezultat i manipulimeve politike dhe menaxhimit të dobët nga ana e LDK-së, e cila ka punësuar mbi 100 persona lidhur me partitë politike në ndërmarrjen “Trafiku Urban”. Gëzim Sveçla nga Vetëvendosje deklaroi se ky është një keqpërdorim i paprecedentë i institucioneve komunale për qëllime propagandistike.
Ai theksoi se ndërmarrjet publike duhet të shërbejnë qytetarëve, jo interesave partiake. Për këtë arsye, Vetëvendosje kërkon ndërhyrjen e organeve të drejtësisë për të nisur hetime mbi akuzat për keqpërdorime në Komunën e Prishtinës.
Ndërkohë, një asamblist tjetër nënvizoi se ndërprerja e transportit publik është një ngjarje historike dhe theksoi se ndërmarrja “Trafiku Urban”, e menaxhuar nga LDK, ka borxhe të mëdha, ndërsa ndërmarrjet e tjera të menaxhuara nga PDK dhe LDK janë në prag të falimentimit. Ai bëri thirrje për transparencë dhe përgjegjësi nga ana e udhëheqësve komunalë.
Leave a Reply