Më 8 shtator 2025, Haziri Haziri, 77-vjeç, u arrestua nga autoritetet serbe në Merdarë dhe po mbahet në një burg në Serbi nën akuzat për krime lufte në Kosovë gjatë viteve 1998-1999.
Familja e tij kërkon ndërhyrjen e institucioneve kosovare për kthimin e tij, duke theksuar gjendjen e tij të rënduar psikologjike. Kaltrina Haziri, vajza e tij, shprehet për Agjencinë e Lajmeve Ekonomia Online se arrestimi i të atit ishte arbitrar dhe pa shpjegim.
Haziri u ndalua fillimisht në kufirin e Merdarës dhe më pas u transferua në paraburgim në Beograd, ku ndaj tij u ngrit një akuzë për krime lufte dhe u vendos masa e paraburgimit prej 30 ditësh. Familja e ka vizituar atë disa herë, pasi komunikimi telefonik nuk i është lejuar.
Kaltrina thekson se akuzat janë të pabaza, gjë që konfirmohet edhe nga avokati i angazhuar. Ajo bën thirrje për ndërhyrje nga institucionet e Kosovës për lirimin e tij.
Ndërkohë, Ministria e Punëve të Jashtme e Kosovës ka kërkuar shpjegime nga autoritetet serbe për arrestimin e një tjetër shtetasi kosovar, Avni Qenaj, duke kërkuar transparencë në procedurat e ndjekura.
Leave a Reply