Janina Ymeri nga LDK ka kritikuar ashpër ministren në detyrë të Ekonomisë, Artane Rizvanolli, duke e akuzuar për mungesë transparence dhe përgjegjësie lidhur me skandalet në sektorin energjetik gjatë qeverisjes Kurti.
Ymeri falënderon ministren për “aktivizimin e vonshëm” në lidhje me kompaninë EFT dhe tregtinë e energjisë, por thekson se është e papranueshme që institucionet të veprojnë vetëm kur i intereson një pale specifike. Ajo kërkon publikimin e plotë të kontratave të energjisë gjatë mandatit të Rizvanollit për të sqaruar rolin e NOA Energy Trading dhe përfitimet e EFT nga shitjet ndërkufitare.
Ymeri akuzon ministren se po ngatërron qëllimisht çështjen e importit të energjisë me shitjet e kapaciteteve, duke theksuar se Kosova, për shkak të mungesës së kapaciteteve energjetike, përballet me humbje të mëdha. Ajo ngre edhe çështjen e trajtimit të veçantë të veriut të vendit dhe pyet përse qytetarët e tjerë të Kosovës përballen me rritje çmimesh të energjisë.
Në fund, Ymeri kërkon përgjegjësi për dështimet në KEK dhe për krizën energjetike, duke shprehur gatishmërinë për debat publik me dokumente të plota dhe teknike mbi këtë çështje.
Leave a Reply