Kosova duhet të llogarisë humbjen e rreth 42 milionë eurove që u shpenzuan për mbulimin e kostos së energjisë elektrike në veri, pasi Elektrosever nuk arriti të përmbushte detyrimet e licencës së saj nga Tetori 2022 deri në Dhjetor 2023.
Bashkimi Evropian ka deklaruar se nuk ekziston një bazë ligjore për të kompensuar këtë humbje financiare ndaj Kosovës. Në një deklaratë të mëparshme, ishte premtuar nga ish-Përfaqësuesi i Posaçëm për Dialogun, Miroslav Lajçak, se do të gjendeshin forma financiare për të zbutur këtë situatë dhe për të ruajtur licencën e Elektroseverit.
Megjithatë, Shërbimi i Jashtëm i BE-së konfirmoi se ky kompensim nuk do të ndodhë. Zëvendëskryeministri në detyrë, Besnik Bislimi, informoi se Lajçak kishte kërkuar që Zyra e Rregullatorit për Energji të mos tërhiqte licencën e Elektroseverit, përkundër dështimit të saj në nisjen e faturimit, që duhej të fillonte në Tetor 2022.
Kjo kompani, e cila u licencua në Qershor 2022, nuk filloi faturimin deri në Janar 2024, duke shkaktuar një dëm të konsiderueshëm buxhetor. Në total, dëmi nga mos-pagesa e rrymës në katër komunat me shumicë serbe në veri llogaritet të jetë rreth 350 milionë euro që nga përfundimi i luftës.
Leave a Reply