Gjatë një dëgjese të veçantë në Komitetin për Punët e Jashtme të Dhomës së Përfaqësuesve, Keith Self, kryetar i Nënkomisionit për Evropën, shprehu shqetësimin për rritjen e paqëndrueshmërisë në Ballkanin Perëndimor dhe theksoi nevojën për një strategji më të fuqishme amerikane për të parandaluar përshkallëzime të mundshme.
Ai vuri në dukje se, përveç krizës në Ukrainë, ky rajon mbetet më i paqëndrueshmi në Evropë për shkak të konflikteve të pazgjidhura etnike dhe politike. Këto tensione krijojnë hapësirë për ndërhyrje të aktorëve si Rusia, Kina dhe Irani, që synojnë të dobësojnë ndikimin e SHBA-ve dhe NATO-s.
Self paralajmëroi për rrezikun e një konflikti të ri, me Shqipërinë, Malin e Zi dhe Maqedoninë e Veriut në vijën e parë të zjarrit. Ai theksoi se kjo mund të aktivizojë Nenin 5 të NATO-s, duke e kthyer çështjen në një problem të sigurisë kolektive.
Gjithashtu, ai nënvizoi se Kosova mbetet e cenueshme për shkak të mungesës së anëtarësimit në NATO. Self kërkoi nga vendet e NATO-s në Ballkan të forcojnë përpjekjet mbrojtëse për të shmangur ndërhyrjet e jashtme dhe të ruajnë stabilitetin rajonal.
Leave a Reply