Të gjitha partitë politike të regjistruara për zgjedhjet e ardhshme kanë dorëzuar listat e kandidatëve për deputetë në Komisionin Qendror të Zgjedhjeve, duke përmbushur afatin e vendosur për këtë proces.
Pas kësaj, KQZ-ja do të nisë verifikimin dhe certifikimin e këtyre kandidatëve, hap ky që mundëson përgatitjen për zgjedhjet e parakohshme në Kuvendin e Kosovës. Sipas të dhënave zyrtare, 24 subjekte politike, duke përfshirë partitë kryesore parlamentare dhe përfaqësues të komuniteteve jo-shumicë, kanë dorëzuar listat e tyre.
Numri i kandidatëve varion nga një deri në 110 për secilën listë. Partitë si Lëvizja Vetëvendosje, Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Nisma Socialdemokrate kanë paraqitur listat maksimale me 110 kandidatë.
Në këtë proces zgjedhor janë përfshirë gjithashtu parti nga komunitetet turke, boshnjake, rome, ashkali, egjiptiane, gorane dhe serbe, si dhe nisma qytetare, duke siguruar një përfaqësim të gjerë. Totali i kandidatëve të dorëzuar arrin në 1,181, të cilët do të shqyrtohen nga KQZ.
Pas verifikimit, do të publikohet lista përfundimtare e kandidatëve të certifikuar.
Leave a Reply