Vjosa Osmani po i afrohet fundit të mandatit të saj si presidente, ndërsa diskutimet për të ardhmen e saj politike janë intensifikuar.
Drejtori i Grupit Ballkanik për Politika, Naim Rashiti, sugjeron se rrethanat e reja politike mund të vështirësojnë rizgjedhjen e saj. Ai thekson se bashkëpunimi i saj me Lëvizjen Vetëvendosje mund të jetë pengesë nëse synon një mandat të ri.
Pas zgjedhjeve të jashtëzakonshme të 28 dhjetorit, Rashiti parashikon se marrëveshjet e reja politike do të sjellin emra të rinj për pozitat kyçe, përfshirë presidencën dhe kryeministrinë. Ai nënvizon se të gjitha pozitat institucionale do të jenë të hapura për negociata, varësisht nga rezultati i zgjedhjeve.
Osmani, e cila erdhi në krye të shtetit në vitin 2021 përmes një bashkëpunimi me Albin Kurtin, ende nuk ka bërë të ditur planet e saj për të ardhmen. Megjithatë, ajo ka deklaruar se do të vazhdojë të jetë aktive në politikë edhe pas përfundimit të mandatit të saj në prill 2026.
Rashiti thekson rëndësinë e marrëveshjeve politike për të zgjidhur çështjen e presidencës, duke theksuar nevojën për konsensus të gjerë ndërmjet partive.
Leave a Reply