Abdixhiku premton përfundimin e shpejtë të autostradës Anamoravë

Lumir Abdixhiku, kandidati për Kryeministër nga Lidhja Demokratike e Kosovës, nisi ditën e sotme me një tubim në Gjilan.

Gjatë këtij takimi, ai premtoi përfundimin e autostradës së Anamoravës, një projekt që, sipas tij, është lënë pas dore nga qeveria aktuale. Abdixhiku theksoi se autostrada e Anamoravës nuk duhet të shihet si një luks apo projekt anësor, por si një iniciativë strategjike me rëndësi kombëtare.

Ai e vlerësoi atë si një çështje të rëndësishme për barazinë territoriale dhe premtoi se ky projekt do të ketë përparësi të lartë, duke synuar përfundimin e tij brenda dy viteve të para të mandatit të tij të mundshëm. Ky angazhim i Abdixhikut vjen si një përpjekje për të adresuar neglizhencën që, sipas tij, ka karakterizuar qasjen e qeverisë aktuale ndaj zhvillimeve të infrastrukturës në këtë rajon.