Kryeministri i Kosovës, Albin Kurti, përkujtoi 28-vjetorin e sulmit të dytë të forcave serbe ndaj familjes Jashari në Prekaz, duke e përshkruar këtë ngjarje si simbol të qëndresës për çlirimin e Kosovës.
Më 22 janar 1998, policia serbe sulmoi me armë automatike dhe predha shtëpitë e Shaban Jasharit në Prekaz, ku ai së bashku me djalin e tij, Hamza, qëndruan për të mbrojtur familjen e tyre. Kurti tha se ky ishte sulmi i dytë pas atij të 30 dhjetorit 1991, datë që më vonë u bë Dita e Veteranëve të Ushtrisë Çlirimtare të Kosovës.
Ai shtoi se rezistenca e kësaj familjeje ishte një shembull i fuqishëm kundër regjimit serb. Në këtë ngjarje, dy vajza të familjes Jashari, Selvete dhe Iliriana, u plagosën.
Kurti theksoi se dëshmitë filmike dhe fotografitë e ruajtura nga mediat janë prova të forta të asaj që ndodhi. Në përfundim, kryeministri nderoi familjen Jashari për rolin e tyre vendimtar në historinë e çlirimit të Kosovës.
Leave a Reply