Alpinistët në malin Everest po sfidohen nga një stuhi e pazakontë dëbore që ka ndodhur në Kinë, duke bllokuar qindra njerëz në zonën tibetiane të kufirit.
Rreth 350 persona janë evakuuar, ndërsa të paktën 200 të tjerë ende mbeten të izoluar, sipas autoriteteve kineze. Këta turistë ishin mbledhur për të festuar “Golden Week”, një periudhë pushimesh 8-ditore në Kinë, por reshjet e dëborës për tre ditë radhazi i kapën në befasi, duke krijuar vështirësi në kampet mbi 4,900 metra lartësi.
Fotografitë e publikuara tregojnë tendat e mbuluara nga bora dhe njerëz që lëvizin me vështirësi në dëborë që arrin deri në një metër. Një alpinist kinez përshkroi kushtet si më të vështirat që ka përjetuar ndonjëherë, duke theksuar se bora mbulonte pothuajse të gjithë majën e malit.
Ata që arritën të zbrisnin, mbërritën në qytetin e afërt të Qudang, 48 km larg bazës tibetiane. Ndërkohë, moti ekstrem ka prekur edhe Nepal, ku reshjet kanë shkaktuar rrëshqitje dhe përmbytje, duke marrë jetën e të paktën 47 personave.
Autoritetet kineze kanë pezulluar përkohësisht vizitat në zonën turistike të Everestit derisa moti të qetësohet.
Leave a Reply