Agjencia e Menaxhimit Emergjent (AME) ka raportuar se situata e vërshimeve në gjithë vendin është nën kontroll dhe e qëndrueshme.
Rënia e reshjeve të shiut dhe fillimi i borës kanë ndihmuar në përmirësimin e situatës me nivelet e ujërave të lumit që po bien gradualisht. Fatmirësisht, nuk ka humbje në jetë njerëzore, dhe nuk ka shenja për përkeqësim të situatës.
Në rajonin e Prishtinës, disa rrugë janë përmbytur, si në Kodrën e Diellit dhe Hajvali, ndërsa rajone si Fushë Kosova dhe Obiliqi mbeten të qeta. Në Prizren dhe komunat përreth, situata është gjithashtu e qetë, me disa ndërhyrje të vogla teknike në Malishevë dhe Dragash.
Në Mitrovicë, një familje është evakuuar, por gjendja aktualisht është e qetë. Në Pejë dhe rajonin përreth, situata është e qëndrueshme me disa segmente rrugore që kërkojnë kujdes.
Në Gjakovë, situata është e qëndrueshme, ndërsa në Gjilan ka pasur përmbytje në disa rrugë. Komunat e tjera në këtë rajon nuk janë prekur nga vërshimet.
Leave a Reply