Lidhja Demokratike e Kosovës ka vendosur të thërrasë kuvendin e saj këtë të shtunë, më 31 janar, ku pritet zhvillime të rëndësishme.
Kryetari aktual, Lumir Abdixhiku, ka bërë të ditur se do të ofrojë dorëheqjen në këtë takim, gjë që u konfirmua nga Besian Mustafa pas mbledhjes së datës 19 janar. Në të njëjtën kohë, ish-kryeministri Avdullah Hoti njoftoi përmes Facebook-ut se do të garojë për postin e kryetarit të partisë në këtë kuvend.
Lidhur me këto zhvillime, anëtari i kryesisë, Arben Gashi, deklaroi për Indeksonline se çdo kandidaturë është e mirëseardhur dhe theksoi rëndësinë e votëbesimit të kryetarit aktual si pika e parë e rendit të ditës. Gashi shprehu mbështetje për dorëheqjen e Abdixhikut, duke pohuar se është në favor të ndryshimeve brenda partisë.
Kuvendi pritet të fillojë në orën 12:00, sipas një njoftimi nga vetë Abdixhiku në rrjetet sociale, ku ai theksoi se LDK nuk trembet nga proceset demokratike të brendshme.
Leave a Reply