Një operacion policor në fshatin Jagnjenicë të Zubin Potokut ka rezultuar në gjetjen dhe sekuestrimin e armëve dhe eksplozivëve në një shtëpi të braktisur.
Policia e Kosovës njofton se më 24 janar 2026, pas marrjes së informacioneve për armë dhe mjete shpërthyese në një objekt të braktisur, njësitë e saj ndërhynë në vendngjarje. Gjatë kontrollit, u zbuluan një pushkë M48, 244 fishekë të kalibrave të ndryshëm, dy karikatorë të zbrazët dhe një sasi eksplozivi.
Njësia për Trajtimin e Eksplozivit (EOD) u mor me largimin e sigurt të eksplozivit, ndërsa hetimet janë në vijim për të përcaktuar llojin e saktë të tij. Këto veprime u zhvilluan në koordinim me Prokurorin e Shtetit, i cili ka udhëzuar nisjen e procedurës për veprën penale të posedimit të paautorizuar të armëve.
Aktualisht, nuk ka persona të arrestuar. Policia falënderon qytetarët për mbështetjen dhe i inkurajon të raportojnë çdo informacion të dobishëm për sigurinë publike në numrin 192.
Leave a Reply