Në një operacion të realizuar nga Policia e Kosovës në një shtëpi të braktisur në fshatin Joshevik, komuna e Zveçanit, janë zbuluar dhe sekuestruar armë dhe municion.
Ky aksion u zhvillua më 24 janar, rreth orës 09:20, pas marrjes së informacioneve përmes kanaleve operative. Gjatë kontrollit, autoritetet gjetën dhe konfiskuan një armë automatike AK-47, një pushkë gjysmë-automatike dy tytëshe, dhe disa karikatorë, përfshirë 10 të zbrazët dhe 6 të mbushur me nga 30 fishekë.
Në total, u kapën 84 fishekë për pushkë automatike dhe 14 fishekë për pushkë gjysmë-automatike. Gjithashtu, u sekuestruan dy granata dore M50 dhe pajisje për pastrimin e armëve.
Rasti është duke u hetuar për veprën penale të “Mbajtjes në pronësi, kontroll ose posedim të paautorizuar të armëve”, me miratimin e Prokurorit të Shtetit. Aktualisht, nuk ka informacion për arrestime, dhe hetimet janë ende duke vazhduar.
Leave a Reply